Showing posts with label கவிதை. Show all posts
Showing posts with label கவிதை. Show all posts

Sunday, January 15, 2012

தொன்மத் "தொழில்".



• குண்டூசி கூடக்
கூவிக் கூவி
விற்கப்படும்
இந்தக் காலத்திலும்

ஆர்ப்பாட்டமின்றி
அமைதியாகவே
தொடர்கிறது
உலகின்
ஆதித் "தொழில்".

• பெரு வணிகத்தின்
ஒப்பனையில்
மயங்கித் திளைக்கிறது
உலகம்.

• திகைத்துத்
தவிக்கிறது
அலங்காரமற்ற
அழகான
சிறு, குறு
வர்த்தக உலகம்.

• வணிகமாகி விட்ட
யுகத்தில்
கூவிக் கூவியே
மடமை வலைக்குள்
ஈர்க்கப்படுகிறது
மனுக் குலம்.

• அத்தனை
கூச்சலுக்கு
இடையிலும்
சலனமற்று
சப்தமின்றி
அமைதியாய்
நடக்கிறது
தொன்மத் "தொழில்".

Saturday, December 31, 2011

“முத்து மழை”



* அபூர்வமாய்
வாய்த்தது
அடைமழைத்
தருணம்.

* நெஞ்சிலும் ஓயாத
சத்த மழை.

* விரித்த குடையோடு
வீதியில் வருகிறாய்....:)

* சடுதியில்
சர்வ நாடியும்
ஒடுங்கிப் போயின
சாதுவாய்....!

* மழையை ரசிப்பதா?

* உன்னை ரசிப்பதா?

* மாறி மாறி
யோசிக்கும் என்னையே
பரிகசிப்பதா?

* வியப்பில்
வியர்த்த வேளை

* குறும்பாய்த்
தலை சாய்த்துக்
கூடவே
குடை சாய்த்தாய்…..!

* பட்டுத் தெறித்த
மழைத் திவலைகளில்
ஒரு துளி
இறங்கியது
என்
நெற்றியில்….

* சிப்பிக்குள் விழுந்த
மழைத்துளியாய்ச்
சிலிர்த்துப் போனது
மனசு.

* இப்போது
முத்து மழை.
.
.
.
.
.
.

* இனி எப்போது
முத்த மழை?!...:)

Saturday, December 24, 2011

முழு “நீல”ப்படம்



•நாயகனை
ஓரக் கண்ணால்
பார்ப்பதே பேரழகு
தாத்தா காலத்தில்....

•நாயகனும் நாயகியும்
தொட்டுத் தொட்டுப்
பேசுவதே பேராச்சர்யம்
அப்பா காலத்தில்...

•தளுக்குறதுக்கும்
குலுக்குறதுக்கும்
தனித் தனி நாயகி
இது தமையன் காலம்....

•படம் முழுக்கப்
அந்தப் பொறுப்பையே
நாயகி
பாந்தமாச் செய்யுறா
என் காலத்தில்...

•படங்கள் யாவும்
நீளம் என்பது
திரிந்து
எல்லாமே
“நீலமாகி விடுமோ?”
வருங்காலத்தில்.... :(

Friday, December 2, 2011

இணையில்லா இறைவா!



இணையில்லா
இறைவா!

அன்புக்கு
நீயே ஆதாரம்.

அசதியின்
அவசரத்தில்
அதை மறந்தால்
வாழ்வே சேதாரம்.

கருணைக்கு
நீயே மூலாதாரம்.

அந்த
நம்பிக்கையே
இகபர வாழ்வின்
ஜீவாதாரம்.

மண்ணில்
மன்பதைகளை
மாண்புறக் காப்பவனே!

இமைப் பொழுதும்
எனை
என் பொறுப்பில்
சாட்டி விடாதே!

கார்மேகக்
கருணையாளனே!


அசத்தியம் முறித்து
சத்தியம் வெல்ல
நீயே
கணை.

உன்
கனி விழிப்
பார்வையின்
கண்ணியில்
என்னையும்
பிணை.

உன் வழி
வாழும்
நல்லடியார் குழுவில்
என்னையும்
இணை.

இகமதில்
அகமதில்
முஹம்மதின்
துணையோடு
கதிபெற
இப்போதும்
முப்போதும்
எப்போதும்
நீயே
துணை.

Monday, October 24, 2011

பயணம்.




 ஞானத் தேடலில்
எடுத்து வைக்கும்
முதல் அடி.

 பிரியமுள்ளவர்களைப்
பிரிந்து பின்
சேருவதை உணர்த்தும்
பால பாடம்.

 அன்பின்
அடர்த்தியை
அறிய வைக்கும்
ஆன்ம சோதனைக் களம்.

தொலைவு
முக்கியமல்ல.

நோக்கமே
பிரதானம்.

எங்கே போகிறோம்?
எப்போது திரும்புவோம்?
... ... ... ... ...
... ... ... ... ...
... ... ... ... ...
இப்படியான கேள்விகளிலும்


அவற்றின் பின்னே
ஒளிந்திருக்கும் விடைகளிலும்
துடித்து நிற்கிறது
உறவுகளின் உயிர்.

அறியாமை அகல
ஆன்மத் தேடலைத்
தொடங்கி வைக்கும்
ஆதிச் சுழி.

முன்னும் பின்னுமாய்
கடந்த தூரமும்
கடக்க வேண்டிய
தொலைவும்
மிச்சமிருக்கின்றன
இன்னும்…

காலக் கயிறு
சுழற்றி விட்ட
பம்பரம் போல்
சுற்றிக் கொண்டு
அலைகிறது மனது.

தொடரத் தொடரப்
பயணங்கள்...

தொலைவு கடக்கும்
துயரங்கள்.


எல்லை மீறும் பயணம்
தொல்லை சேரும் தருணம்.

கடந்து செல்லும்
காலத்தை
நினைவுப் பெட்டகத்தில்
உறைய வைக்கும்
உற்சாக அனுபவம்.

நினைவுச் சாளரம் திறந்து
நிகழ்காலத்தின்
வெளிச்ச ரேகை பரவ
உள்ளுக்குள் ஒளியேற்றும்
உன்னத உணர்வு – பயணம்.

கரை தொடும்
அலைகள்
கடலிடம் மீள்வது போல்
தினம் தினம்
தொடர்கிறது
தேடலுக்கான பயணம்.

மன அடுக்குகளின்
இடுக்குகளில்
வெளிச்சம் பாய்ச்ச
அவசியம் தேவை
பயணம்.

Friday, October 21, 2011

தனிமைக் கண(ன)ம்



அருகில்
இருந்த பொழுதுகளைக் காட்டிலும்
விலகி இருக்கும்
தருணங்களில்
அதிகம் நினைக்கப்படுகிறாய்
நீ.

கடந்து செல்லும்
நங்கையரின் நயனங்களில்
உன் தனித்துவம்
தேடித் தேடித்
தோற்றுப் போகிறேன்
நான்.

தனிமையின்
வெறுமையால்...
கடக்கும்
ஒவ்வொரு கணமும்
கனத்துப் போயிருக்கிறது
மனம்.

காற்று வெளியில்
மிதக்கும் குரல்களில்
உன் மகரந்தச்
சொற்களைத் தேடியலைகின்றன
என்
செவிப் பட்டாம்பூச்சிகள்.

வறண்ட தொண்டையை
நனைக்க வரும்
தண்ணீரின் தண்மைக்காகத்
தாகித்திருக்கிறது
என் நாவு.

தாமதிக்கும் கணங்கள்
அத்தனையும் நோவு.

விலகி இருப்பது
விவாதத்துக்கு நல்லது.
விவாகத்துக்கு அல்ல.

விரைந்து
வா தேவி!

தவறினால்…

தவிப்பில்
கரைந்து போகும்
என் ஆவி!!!


Monday, April 18, 2011

பொதுப்பெயர்




என்
பிள்ளைக்கு
உன் பெயரும்...

உன்
பிள்ளைக்கு
என் பெயரும்...

வேண்டாம்
இப்படி...!

வா...!

இணைந்தே
சூட்டுவோம்
நம் பிள்ளைக்கு
நல்லதொரு
"பொதுப்பெயர்".

Monday, June 14, 2010

அ(ம்)ன்புச் சொற்கள்.



சுத்தியுள்ளவர்களை
அச்சம் கொள்ளச்
செய்யும்
கத்தி வீசும்
கண்கள் உனது.

சொல்வதைக் கேட்டே
தீர வேண்டுமென்ற
மென்வன்மம்
உன் வார்த்தைகளில்.

பேச்சுக்கிடையே
கலைந்து விழும்
கேசத்தைச்
சரி செய்கிறாயா?

கவனிக்கத் தவறும்
என்னைப் பரிகசிக்கிறாயா?

இதுவரை தெளிவில்லை
எனக்கு.

ஆனாலும்

உன்னோடு பேசுவதற்கும்
உன்னிலிருந்து
இன்னும் இன்னும்....
பெறுவதற்கும்
மிச்சமிருக்கின்றன
அன்பு தோய்ந்த சொற்கள்.

Tuesday, June 8, 2010

தொலைக்"காதல்"



உன் அழைப்பைத்
துல்லியமாக
இனங்காட்டும்
'செல்' ஒலி.

அலுவலுக்கிடையே
வருகின்ற
உன் அழைப்புகளை
தவிர்த்து விடுகின்றேன்
வேண்டுமென்றே.

மீண்டும் மீண்டும்
விடாமல்
தொடர்கிறது
'செல்'லொலி.

சினமடைவாய்
எனத் தெரிந்தே
நிர்த்தாட்சண்யமாய்
நிராகரிக்கிறேன்
உன் அழைப்புகளை.

பேசும் பொழுதுகளை விட
பேசாக் கணங்களில் தான்
நம்மைப் பொதிந்து
வைத்திருக்கிறது
காதல்.

Friday, May 7, 2010

அன்னையர் தினம்



தாயைப் போற்றும்
தமிழ்ச் சமூகத்திற்குச்
சொல்லித் தந்தது
எவன்?

"அம்மாவுக்கு
ஒரு தினம்" என்று.

அவளுக்காகத் தான்
"அனு(ணு) தினமும்".

Wednesday, May 5, 2010

விழி மொழி.




உன்
விழி மொழியின்
பின்னே
திரண்டு நிற்கும்
சொற்களின்

அடர்த்தியையும்,
வலிமையையும்
என்ன சொல்லிப்
புரிய வைப்பது?

தெளிவுரை
பதவுரை
பொழிப்புரை
... ... ...
... ... ...

இப்படியே
பழக்கப்பட்ட
இவர்களுக்கு

அவசியம்
அருள்வாய்
உன் இதழுரை.

Thursday, April 29, 2010

மழலைச் சாரல் :)



கொதிக்கும்
தார்ச் சாலை.

வியர்வையின்
புழுக்கத்தில்
தொப்பலாய் நனைந்து
விசனத்தோடு
போக்குவரத்துச்
சமிக்ஞைக்காகக்
காத்து நின்ற
கணம்.

கடந்து சென்ற
பேருந்தில்
கை நீட்டியவாறே
சிரித்துச் செல்கிறது
குழந்தை.

மனதில் பட்டுத்
தெளி(றி)த்தது
மழலைச் சாரல்.

Thursday, April 22, 2010

சிறகு முளைத்த சொற்கள்.



உன்னை விட
அழகில்லை
உன் கையெழுத்து.

பின்னே எப்படியாம்?

கோழி கிறுக்கியதைப் போல.


"அவை
சிறகு முளைத்த
சொற்கள்" என்றாள்
சினந்த முகத்தோடு
சிணுங்கியவாறே.

அட ஆமா!

என் ஆச்சர்ய
விழிகளுக்குள்
ஆயிரம் பட்டாம்பூச்சிகள்.


Wednesday, April 21, 2010

வலி காலம்.




காலம்
காயம் ஆற்றுமாம்.

யார்
வந்து ஆற்றுவது?

அது தந்த
வலியையும்
தழும்பையும்.

Monday, April 12, 2010

'கலை' வீடு



வட்டமாய்க் கொஞ்சம்.

சதுரமாய் இன்னுஞ் சில.

நீள் வட்டத்திலும் கூட.

வடிவங்கள் எத்தனையோ
அத்தனையும் உண்டு
அவனிடம்.

விளையாட அழைத்தான்
வேகமாய் வந்து.

கட்டி முடித்தேன்
எனக்கே எனக்கான
வீட்டைப் போலக்
வெகு பிரயத்தனத்துடன்.

சிரித்துக் கொண்டே
எட்டி உதைத்தான்
திரும்பி வந்து பார்த்தவன்.

கட்டிய வீட்டை விட
அழகாய் இருந்தது
அவன்
கலை(ந்)த்த வீடு.

Sunday, December 28, 2008

பேரெழில்



என் கண்கள்
என்னைப்
பார்ப்பதை விட

உன் விழிகள்
என்னை நோக்கும்
வேளைகளில்

பேரெழிலாய்
உணர்கிறேன்
நான்.

Tuesday, December 23, 2008

கருகிய ரோஜாவும், கடைசிக் கேள்விகளும்



அண்மையில் வாசிக்கக் கிடைத்த கவிதை.
நண்பர்களோடு பகிர்வதில் மகிழ்ச்சி.

Friday, November 21, 2008

காத்து கறுப்பு


காத்து கறுப்பு
ஏனோ தெரியலை
அடிக்கடி வந்து
போகிறது
தீக்குளித்த
கறுத்தம்மாவின்
நினைவு।
சுழன்றடித்த
காற்றின் வேகத்தில்
மின் கம்பியில்
மோதி
உயிர் விட்ட
காகத்தைக் கண்ட
கணந்தொட்டு....:(

Wednesday, November 19, 2008

நரை



நரை


முதுமை
முகவரியின்
முதல் வரி.

அந்தி(ம)க் கதிரின்
ஆரம்ப
நிறப்பிரிகை.

ஒழுகும் ஆயுளை
உணர்த்தும்
ஒளிக் கீற்று.

தழும்பும் இளமை
தடம் மாறாமல்
தடுக்கும் சமிக்ஞை.

தடுமாறிய தருணங்களை
மீள்பார்த்துச்
சரிபார்க்கச் சொல்லும்
மனக்கணக்கு.

காலன் பதிவேட்டில்
புதுக்கணக்குக்கான
ஆதிச் சுழி.

Tuesday, November 18, 2008

கொழந்த


கொழந்த :)

ட்ரிங்.. .. .. ட்ரிங்.. .. ..

வாழ்த்துகள்.

மகிழ்ச்சி.

என்ன குழந்தை?
....

யாரை மாதிரி?
...

தாத்தா?
....

பாட்டி?
....

அம்மம்மா?
...

அம்மா?
....

அப்பா?
...

பின்னே யாரு மாதிரி?

கொழந்த மாதிரி :)